ከፍስሃ እሸቱ (ዶ/ር)

በቅርቡ ከዳር ቆሞ ለዉጥን መጠበቅ የህልም እንጀራ በሚል በትግሉ ጎራ ላይ ያለኝን የግሌን አመለካከት የሚገልፅ ፅሁፍ ለወገኖቼ ማቅረቤ ይታወሳል። ይንንኑም ተከትሎ የተለያዩ አስተያቶች ከበርካታ አንባብያን ደርሰዉኛል። ወገኖቼም በቀረበዉ ሀሳብ ላይ ተነስታችሁ ለሰጣችሁኝ ገንቢ አስተያቶች የከበረ ምስጋናዬን አቀርባለሁኝ። ከበርካታ ወገኖችም በፅሁፉ የተዘረዘሩትን ችግሮችና የመፍትሄ ሀሳቦች በመገምገም በቀጣይነት ምን ማድረግ አለብን ትላለህ የሚሉ በርካታ ጥያቄዎችም ቀርበዉልኛል። በበኩሌም ለጥያቄዉ ከፍተኛ ትኩረትን በመስጠት የላይና የታቹን በማሰላሰል፤ የግራና የቀኙን በማመዛዘን፤ በልቤ የሚሰማኝን ከህሊናዩ ጋር በመሟገት ለዉይይትና ለተግባራዊነቱ በጋራ እንድንቀሳቀስ አዲስ ሀሳብ (thesis) አቀርባለሁኝ።
ባለፈዉ አንድ አመት ጨቅላ የትግል ተመክሮዬ፤ በነፃነት ትግሉ ጎራ ዉስጥ ከበርካታ ወገኖች ደግሞ ደጋግሞ የሚነሳዉና አብዛኛዉ ህብረተሰብ የሚስማማበት ጉዳይ የህወሃት/ኢህአዴግ ስርአት ለሃያ አንድ አመታት በላያችን ላይ እንደፈለገዉ እየጨፈረብን፤ ህዝባችንንና አገራችንን እያመሰ፤ ወገኖቻችንን እያሰቃየ፤ ከሃገር እያሰደደ፤ እያሰረ ሲሻዉም እየገደለ፤ ተንሰራፍቶ አገራችንና የኢትዮጵያዊነትን ስሜት እያጠፋ ያለዉ በስርዓቱ ጥንካሬ ሳይሆን ባንፃሩ በተቃወሚ ጎራዉ አንድነት መጥፋትና መዳከም ነዉ። የህዙቡንም ስሜት ባጭር ቃላት ስናስቀምጠዉ አሰባሳቢ መሪ ወይንም አዉራ መታጣቱ ነዉ።

በትግሉ ጎራ ሁሉም ስርዓቱን የመለወጥ በምትኩም ፍትህ የሰፈነባት፤ ህዝቦቿ በእኩልነት፤ በነጻነት፤ በክብርና፤ በአንድነት የሚኖሩናት፤ በፍፁም ዲሞክራሲያዊ መንገድ ተመርጦ ህዝቡን የሚገዛ ሳይሆን የሚያገለግል መንግሥት የሚመሰረትባት ኢትዮጵያን መመስረት አንድ ቋንቋ ይናገራሉ። ሆኖም ይህንን አንድ ቋንቋ እየተናገሩ፤ እንደ ባቢሎን ቋንቋ ተቃዋሚዉ መደማመጥ፤ መከባበር፤ መተባበር፤ መቻቻል፤ አቅቶት፤ ህብረተሰቡም ማንን መደገፍ እንዳለበት ግራ ተጋብቶ ሁሉም ዉጥንቅጡ ባለበት ሁኔታ ዉስጥ እንገኛለን። ጉዳዩ ባጭሩ ሲጠቃለል የሚያስተባብረን፤ ምክር የሚሰጠን፤ አቅጣጫ የሚያሲዘን፤ ስንጣላ የሚያስታርቀን፤ ስንደክም ሚያበረታታን፤ የአንድነታችን፤ የጥንካሬያችን የተስፋችን ምልክት መሪ ማጣታችን ትልቅ ኪሳራ ላይ ጥሎናል። እኛ ለፍትህ፤ ለነጻነት፤ ለእኩልነት፤ ለዲሞክራሲ፤ ለአንድነት፤ ለኢትዮጵያና ለኢትዮጵያዊነት ክብር ከምንም በላይ ሁላችንንም የሚያኮራ የትግል አላማ ይዘን መሪ አጥተን እየተንከራተትን ሳለን፤ ባንፃሩ ገዳዮች፤ ጨቋኞች፤ ዘረኞች፤ ከፋፋዮች፤ ኢትዮጵያንና ኢትዮጵያዊነትን በእርኩስ ተግባራቸዉ እያጠፉ ያሉች የስርዓቱ አቀንቀኞች ግን በህይወት ብቻም ሳይሆን ሞቶም እንኳን አንድ አድርጎ እስተባብሮ የሚመራቸዉ ማግኘታቸዉ ብርታትንና ጥንካሬን ሰጥቷቸዉ የመሪን፤ የመተባበርንና ያንድነትን አስፈላጊነት በተግባር እያስተማሩን ይገኛሉ።

የእራኤል ልጆች በፈርኦኖች አገር ሲማቅቁ መሪያቸዉ ሙሴ ነፃ አወጣቸዉ፤ አርባ አመትም በበረሃ ሲንከራተቱ የብርታታቸዉ፤ የጥንካሬያቸዉ፤ የአንድነትና የተስፋቸዉ ምሰሶ ሆናቸዉ፤ ጥቁሮች በነጮች ጭቆና ሲዳክሩ ማርቲን ሉተር ኪንግ የአንድነታቸዉና አቅጣጫ ጠቋሚያቸዉ ሆኖ በእርሱ ራእይ ጥቁሮች ነፃ መዉጣት ብቻ ሳይሆን ዛሬ ታላቋ ሀገር አሜሪካ በጥቁር መመራት ጀምራለች፤ በደቡብ አፍሪካ ጥቁሮች አገራቸዉን ተነጥቀዉ እንደ እንስሳ ሲገዙ ማንዴላ የትግላቸዉ ምልከትና አስተባባሪያቸዉ በመሆን ነፃ እንዲወጡና በአለም ላይ የነፃነት ተምሳሌት ለመሆን በቅቷል። ሌሎችም እንደ ጋንዲ፤ አን ሳን ሱቺ፤ የመሳሰሉ የነፃነት አዉራዎችን በዚሁ አጋጣሚ መጥቀስ ይቻላል። አኛ የነፃነት ትግል እያከናወንን የመገኘታችን ያክል ከነዚህ አገሮች የመሪን አስፈላጊነት የምንማር ይመስለኛል።

ጊዜዉና ትግላችን የራሳችን ማንዴላ፤ የራሳችን ማርቲን ሉተር ኪንግ፤ የራሳችን ጋንዲ እንዲሁም የራሳችን አን ሳን ሱቺን የመሰለ የሚያስተባብረን፤ ያንድነታችን፤ የነፃነታችን፤ የአልሸነፍ ባይነታችን፤ ምልክት የሚሆን መሪን እየጠየቀ ይገኛል። ብዙዎቻችን የአሰባሳቢም ሆነ የመሪ አስፈላጊነት ላይ የምንስማማ ቢሆንም ዋናዉ ጥያቄ ግን ለመሆኑ እንዲህ አይነት መሪ በሀገራችን ይገኛል ወይ የሚለዉ ሆኗል። ለጥያቄዉ ያለኝ አጭር ምላሽ ያለመጠራጠር በትክክል ይገኛል ነዉ። ከዚህ አንጻር ሌላዉ የሚነሳዉ ጥያቄ የምንፈልገዉ መሪ ምን ምን መስፈርቶችንና ባህሪዎችን መላበስ ይኖርበታል የሚለዉ ይሆናል። በኔ እምነት መሪዬ ብዬ የምከተለዉ ፍፁም የአገር ፍቅር ያለዉ፤ ለሀገሩና ለቆመለት መርህና አላማ ለመሰዋት ወደሗላ የማይል፤ አርቆ አሳቢ፤ በሚያወራዉ ሳይሆን በተግባር የተፈተነ፤ በትግሉ ሳያሰልስ ለአመታት በመታገል መስዕዋትነትን እየከፈለ የሚገኝ፤ እንደወርቅ በእሳት የተፈተነ፤ ለማንም የፖለቲካ ቡድን የማይወግን፤ ለሰዉ ልጆች ክብር ያለዉ፤ መልካም ስብእና ያለዉና፤ ሀገራዊና አለማቀፋዊ እዉቅናና ተቀባይነት ያለዉ እንዲሆን እመርጣለሁ።

መቼም ነብይ በሀገሩ አይከበርም ሆኖብን ነዉና ኢትዮጵያ በታሪኳ የእንደዚህ አይነት ጀግኖች መካን ሆና አታዉቅም። ሀገራችን ታሪካቸዉንና ገድላቸዉን በኩራት የምንዘክርላቸዉ በርካታ ብርቅዬ ልጆች ያፈራች ስትሆን በዘመናችንም ከላይ የተዘረዘሩትን መስፈርቶች የሚያሟሉ ልንኮራባቸዉና ሊመሩን የሚችሉ የጊዜአችን ጀግኖች አሉን። ከነዚህ ብርቅዬ የሀገራችን ልጆች መካከል አንዱን መርጠን በማክበርና ልንሰጠዉ የሚገባንን ድጋፍ በመስጠት ከልባችን የምንከተለዉ መሪያችን በማድረግ አሁን በየአቅጣጫዉ የተበታተነዉን ትግል ማሰባሰብ ይጠበቅብናል። ትግሉ ከተሰባበሰ፤ ከተቀነባበረና፤ አቅጣጫና ግብ ኖሮት ከተከናወነ ጥንካሬ በማግኘት ዉጤታማ መሆኑ አይቀርም። ስለዚህ ምርጫዉ የሁላችንም ነዉ። በዘመነ መሳፍንት በታሪካችን እንዳሳለፍነዉና በወቅቱም ትግል እንደምናደርገዉ ሁላችንም የየራሳችንን ትንንሽ ዘዉዶች ደፍተን እርስ በእርሳችን እየተናቆርን ትናንሽ የሃሳብ ጉልቶችን ይዘን መቀመጥ። ወይም ፈረንጆቹ እንደሚሉት ከጊዜዉ ጥያቄ ጋር አድገን፤ ከራሳችን በላይ ሀገራችንና ህዝባችንን አስቀድመን በአንድ መሪ ዙርያ በግልም ሆነ በድርጅት ተሰባስበን ትግላችንን ማከናወን።

የኔ፤ የግሌ ምርጫ ግልፅ ነዉ። መሪ እፈልጋለሁ። የራሴን ኢትዮጵያዊ ማንዴላ እፈልጋለሁ። አስተባባሪ፤ መካሪ፤ አቅጣጫ ጠቋሚ፤ አስታራቂ፤ የተስፋ፤ የአላማና የኢትዮጵያዊነት ምልክት። ወያኔ ሟቹን መሪያቸዉን ታላቁ መሪ ብለዉ እንዳመለኩት፤ እኔም የኔ የምለዉ መሪ እፈልጋለሁ። ለመሪዬም የሚገባዉን ክብርና፤ ድጋፍ፤ ለመስጠት እሻለሁ። በመሪና በኢትዮጵአዊነት ካምፕ ዙርያ ተሰባስበን ዘላቂ፤ መሰረታዊና እዉነተኛ ለዉጥ እንዲመጣ እሻለሁ ለተግባራዊነቱም እታገላለሁ። በዚሁም የልባዊ ፍላጎትና ጽናት በመነሳት መሪዬን ከጀግኖች መካከል መምረጥ ጀመርኩኝ። የህሊና ምርጫዉም እጅግ አስቸጋሪ ነበር። ሁሉም ጀግኖቻች በተለያ ደረጃ የራሳቸዉ የሚከበር ባህሪና የከፈሉት መስእዋትነት ቢኖርም የግድ አንድ መምረጥ ስለሚኖርብኝ ሁሉምን ሚገባቸዉን ክብር በመስጠት ምርጫዬ ግን አንዱ ላይ አመዘነ።

የኔ ኢትዮጵያዊ ማንዴላ ማነዉ በምንስ መመዘኛ ተመረጠ? ለሚለዉ የኔ ኢትዮጵዊዉ ማንዴላ
1. በትግሉ ከሃያ አመታት በላይ ተፈትኖ እስካሁን ያለማመንታት በፅናት እየታገለ ያለ፤
2. ለኛ ነፃነት፤ ለፍትህ፤ ለመናገር መብት ለእኩልነት በመቆሙ ከዘጠኝ ጊዜ በላይ በፋሽሽቱ ስርዓት ለእስር የተዳረገና አሁንም ለበርካታ አመታት ተፈርዶበት ወህኒ እየማቀቀ ያለ፤
3. ሀብትና ንብረቱን ለሀገሩና ለወገኑ ክብር አሳልፎ የሰጠ፤
4. ለሀገሩና ለወገኑ ነፃነት እስከ መሞት ለመታገል በቃልኪዳኑ የፀና፤
5. እንደሌላዉ ከሀገር ተሰዶ መኖር ሲችል ባርነትንና ጭቆናን ለመታገል ሀገር ቤት በመቅረት እየታገለ ያለ፤
6. በበሳል አንደበቱና በሰላ ፅሁፎቹ ስርዓቱን በፍፁም ጀግንነት ያንገዳገደ፤
7. በፀባዩ፤ በበሳልነቱ፤ ባጠቃላይ በስብእናዉና ለሰዉ ልጆች ባለዉ አመለካከት ፈፅሞ የተከበረ፤
8. የተከበረ የቤተሰብ አስተዳዳሪ፤
9. የሀገሩን ፍቅር ከልጁ ያስበለጠ፤
10. እኛ የሚገባዉን ድጋፍና እዉቅና ባንሰጠዉም በአለም አቀፍ ደረጃ እዉቅናና በርካታ ሽልማቶችን ያገኘ፤
11. በርካታ ፅሁፎችን የፃፈና ለኛ የታገለ እንዲሁም ትምህርቶችን ያስተማረ ሲሆን ሌሎችም እጅግ በርካታ ነጥቦች ማስቀመጥ ቢቻልም በኔ እምነት እንደወርቅ አንድ የሰዉ ልጅ ሊቀበለዉ የሚችለዉን ፈተና በእሳት የተፈተነና አሁንም ድረስ እየተፈተነ ያለ ነዉ።

ከዚህ አንጻር በኔ ፍፁም የማያወላዉል እምነትም ተበታትኖ ያለዉን የትግል ጎራ አሰባሳቢ ሊሆን የሚችል መሪ ከጀግናዉ እስክንድር ነጋ የተሻለ የኛ የዘመናችንና የራሳችን ማንዴላ ይኖራል ብዬ አላምንም። በኔ አመለካከትም እንደ እስክንድር ያለ አለም አቀፍ እዉቅና ያለዉ ጀግና በመካከላችን ማግኘታችን እድለኞች ነን። ጊዜዉ ያለፈበትን በእጅ ያለ ወርቅ፤ ወይም ነብይ ባገሩ የሚለዉን ሗላ ቀር ብሂልና አለመካከት ጥለን በወርቃችን በመኩራት፤ በሱ ዙርያ መሰባሰብ እንጀምር ብዬ ጥሪዬን አቀርባለሁኝ። ስምን መላዕክት ያወጡታል እንዲሉ በታላቁ በእስክንድር ትግላችን መሪ፤ አሰባሳቢ፤ ክብር ያግኝ። የኛ የምንለዉ፤ የምናከብረዉ፡ የምንኮራበት መሪ ይኑረን። በሱ ዙርያ ሰላምን፤ ተስፋን፤ አንድነትን፤ ጥንካሬንና፤ ዉጤትን እናግኝ። ይህንንም ካደረግን በኔ እምነት የምንመኘዉን ለዉጥ እንጎናጸፋለን።

በእስር ላይ ያለና ፖለቲከኛ ያልሆነ ጋዜጠኛ ባለሙያ እንዴት ይህንን እልህ አስጨራሽ ትግል ይመራዋል የሚል ጥያቄ ሊቀርብ ይችላል። ለዚህም በአጭሩ በአለም ላይ የነበሩትና አሁንም ያሉትን የታላላቅ ለዉጥ መሪዎች ማንነትን መለስ ብለን ስናጤን፤ ስንቶቹ ፖለቲከኞች ነበሩ የሚለዉ አፀፋዊ ጥያቄ ምላሹን ይሰጣል ብዬ አምናለሁኝ። ብዙዎቹ ለእዉነት የቆሙና በአርአያነትና በቁርጠኝነት የታገሉ ምሁራን፤ የህግ፡ የሀይማኖት፤ አልፎም ተራ ሰዎች ሆነዉ እናገኛቸዋለን። መሪ በሚያሳየዉ የአላማ ፅናት፤ በመርሁ፤ በተግባር መፈተኑና ሌሎችን ለትግል ለማነሳሳት ባለዉ ፋና ወጊነት ስለሚመረጥ እንዲህ አይነት ጥያቄ እስክንድርን በተመለከተ ሚዛን አይደፋም።

እኔ ምርጫዬን አደረኩኝ። እናንተስ? መሪ አሰባሳቢ ፈላጊዎች ከሆናችሁና እርሱ ምርጫችሁ ከሆነ እንሰባሰብ። በሱ ዙርያ የኢትዮጵያዊነት አንድነት መድረክ እንፍጠርና ተሰባስበን በጋራ እንዲመራን እንጠይቀዉ። ከእስር እንዲፈታም ታላቅ አለም አቀፋዊ ዘመቻ እንጀምር። በዘመቻዉና በሱም አመራር ለትግላችን አለም አቀፋዊ ድጋፍን እናሰባስብ። በዚህም ጥንካሬን በማግኘት አገራችንና ህዝባችንን እንታደግ። ያለዉን የሰጠ እንደሚባለዉ ይህ ለኔ የተሻለዉ አማራጭ ይመስለኛል። ከዚህ በፊትም ደጋግሜ እንዳቀረብኩት ትግል ያለ አቅም አይታሰብምና ተበታትነን ከምንጓዝ አዉራችንን በመምረጥ እንሰባሰብ። በመሰባሰባችንም አቅምን አጎልብተን የኢትዮጵያ ልጆች ይሰባሰባሉ፤ ሀገራችንም አጆቿን ወደ አምላኳ ትዘረጋለች፤ ታላቅም ሀገር ትሆናለች የተባለዉን ትንቢት በኛ ግዜ አዉን እናድርገዉ። እንደ ምናደርገዉም ጥርጣሬ የለኝም!

አምላክ ኢትዮጵያን ይባርክ!

The Ethiopian National Transitional Council (ENTC) announced that it will hold its mid-term general assembly in Washington DC from Feb. 22 – 24, 2013. The meeting will evaluate ENTC’s activities of the past six months and will make necessary adjustments, its news release said.

Representatives of ENTC chapters and local councils from several cities and countries around the world are expected to participate in the 3-day meeting that will be held inside its headquarters in Washington DC.

የኢትዮጵያ ብሄራዊ ሽግግር ም/ቤት ጠቅላላ ጉባኤ በዋሽንግተን ዲሲ በፊታችን የካቲት (ፌብሪዋሪ) ወር ይከናወናል

የኢትዮጵያ ብሄራዊ የሽግግር ም/ቤት ላለፉት ስድስት ወራት የተለያዩ እንቅስቃሴዎችን ሲያከናዉን ቆይቷል። ከም/ቤቱ ምስረታ በኋላ የአካባቢ ምክር ቤቶችን (ቻፕተሮችን) በተለያዩ አገሮች በማቋቋም፤ ድርጅታዊ አቅምን በማጎልበት፤ የትግል ሂደት አቅጣጫን በመቀየስ፤ ከሌሎች ድርጅቶች ጋረ ትብብር በመፍጠርና እንዲሁም አቅሙንና የትኩረት አቅጣጫውን ኢትዮጵያ ውስጥ በማድረግ በርካታ ስራዎችን አከናውኗል። የም/ቤቱ ጠቅላላ ጉባኤ በዳላስ ቴክሳስ የምስረታ ስብሰባው ላይ በወሰነው መሰረት የስድስት ወራቱን የስራ እንቅስቃሴ ለመገምገምና ለሚቀጥሉት ስድስት ወራት ቀጣይ እቅዶችን ለመንደፍ በአሜሪካን ዋና ከተማ በዋሽንግተን ዲሲ በሚገኘው ጽ/ቤቱ ከፌብርዋሪ 22 እስከ 24 ቀን 2013 እኤአ ያካሂዳል። በተለያዩ ሀገሮችና ከተማዎች ቀደም ብለው የተቋቋሙና በመቋቋም ላይ ያሉ የአካባቢ ምክርቤቶች (ቻፕተሮች) ተወካዮች በጠቅላላ ጉባኤው ላይ ይሳተፋሉ። ስብሰባውም በስድስት ወራቱ ውስጥ የታዩትን ጠንካራና ደካማ ጎኖች በመገምገም የሚቀጥሉት ስድስት ወራት አካሄድን በተመለከተ የተለያዩ የፖሊሲና የተግባር ውሳኔዎችን ያስተላልፋል። በስብሰባውም መዝጊያ ዕለት በፌብርዋሪ 24 ቀን 2013 (እኤአ) ህዝባዊ ስብሰባ በማዘጋጀት በሀገራችን ወቅታዊ ሁኔታ ላይና መወሰድ ስለሚገባቸው ፈጣን እርምጃዎች ህዝባዊ ውይይት ያደርጋል። በዚህ ህዝባዊ ስብሰባ ላይ መላው ሀገር ወዳድ ኢትዮጵያዊ ወገኖቻችን ሁሉ እንዲገኙ እየጋበዝን ወደፊት ስለስብሰባው ቦታና ፕሮግራም ዝርዝር መረጃዎችን የምናወጣ መሆኑን እንገልጻለን።

የሽግግር ም/ቤቱ አመራር

ፍስሀ እሸቱ (ዶ/ር)

በሀገራችን ያለዉን ሁኔታ ስንመለከተዉ በጥቂት ቃላት ማጠቃለል የቻላል። ይህም ከድጡ ወደ ማጡ የሚለዉ በጥሩ ሁኔታ የሚገልጸዉ ይመስለኛል። አበዉ ጉልቻ ቢለዋወጥ እንደሚሉ አፈናዉ፤ ስለላዉ፤ እስሩ፤ ግድያዉ፤ ስደቱ፤ ዘረፋዉና፤ ማናለብኝነቱ ሳይቋረጥ ቀጥሏል። አዲሱ ጠቅላይ ሚንስትርና አጋሮቻቸዉም ደግመዉ ደጋግመዉ አስረግጠዉ እንደተናገሩት ለዉጥ የሚባል ነገር እንደማይታሰብና የነበረዉ ሁኔታ ባለበት እንደሚቀጥል ነዉ። ከዚህ አንጻር የለዉጥ የተስፋ ጭላንጭል እንደሌለ በወሬ ብቻ ሳይሆን በተግባራቸዉም አሳይተዉናል። ምንም መራር ቢሆንም እዉነታዉ ግን ስርአቱ መሪዉን ቢያጣ እንኳን፤ በአላማ፤ በአቅም፤ በድርጅትና፤ በስነልቦና፤ ፍጹም የበላይነቱን ተጎናጽፎ ይገኛል።
አበዉ እንደሚሉት አቅሙን የማያዉቅ ሞቱን አፋጠነ እንደሚሉት በተቃዋሚዉ ባንጻሩ የሚታዉ ደሞ፡
1ኛ. እኛ ከወኔ ወኔ የለን፤ መስእዋትነት ለመክፈል ዝግጁነት የለንም
2ኛ. ከአንድነት አንድነት የለን
3ኛ. ከአቅም አቅም የለን
4ኛ. ነጻነትን በምጽዋት ለማግኘት እንፈልጋለን (በዉጭ ሃይሎች)፤ ሌሎች በታገሉትና መስእዋትነት በከፈሉት ተጠቃሚ መሆን እንፈልጋለን
5ኛ. የስርአቱ አራማጆች ወድቆ መነሳትን ሲችሉበት እኛ ግን የወደቅንበት ቀርተናል፤ ከዚህ በፊት በደረሱብን ሽንፈቶች ለምሳሌ በቅንጅት ሽንፈት ተስፋ ቆርጠን ተበታትነናል
6ኛ. ጠላታችን ማን እንደሆነ ማወቅ ተስኖናል፤ ከስርአቱ ይልቅ እርስ በራሳችን ጦር መማዘዙን መርጠናል
7ኛ. በጭንቅላታችን ሳይሆን በስሜታዊነት የምንመራ ሆነናል፤ በአላማ ሳይሆን በጥላቻ ምንመራ ሆነናል
8ኛ. የረዥም ግዜ ዉጤት ሳይሆን አጭር ዉጤት እንፈልጋለን፤ በዚህም ምክንያት ቶሎ ተስፋ እንቆርጣለን
9ኛ. ሁሉም ፈላስፋ፤ አዋቂ፤ መፍትሄ ሰጪ ሆኖ፤ መደማመጥ ጠፍቷል፤ ሁሉም አዋቂ፤ ተናጋሪ፤ ሆኖ የሚታገለዉ ግን ጥቂት ሆኗል – ወሬ ወሬ ወሬ -ሀሜት ሀሜት ሀሜት – ኩነና ኩነና ኩነና – ተናጋኔ ተናጋሪ ተናጋሪ – አድራጊ ጠፋ (የኢንተርኔት፡ ፓልቶክና ሬድዮ፤ ስብሰባ ታጋዮች ሆነናል)
10ኛ. በቀጥታም ሆነ በተዘዋዋሪ አብዛኛዉ ህብረተሰብ ያለዉን ስርአት በአያገባኝም ወይም በፍራቻ ወይንም በጥቅም ተቀብሎ አሜን ብሌ መገዛቱን መርጧል
11ኛ. ከዚህ በፊት በነበሩን ችግሮቻችን ተተብትበን ወደፊት መራመድ ተስኖናል
12ኛ. ሁሉም ጠያቂና ተሳዳቢ እንጂ ደጋፊ፡ አይዞኝ ባይ፤ አብሮ ታጋይ ጠፍቷል
13ኛ. ይሀ ሁሉ በእንዲህ እያለ በእንቅርት ላይ ጆሮ ደግፍ እንዲሉ፤ ከዚህ በፊት ያልነበረ
አዲሱ ፈሊጥ ደሞ አዲሱን ጠቅላይ ሚንነስትር ጊዜ እንስጠዉ የሚለዉ ሆኗል፤ አይ መዘናጋት፤ ራስን ማታለል፤ ሰዉየዉ እንደሆነ ለዉጥ እንደማይኖር እቅጩን ነግረዉናል።
14ኛ. የመቃወም ትርጉሙ ግራ ገብቶናል መቃወም ማለት ሁሉንም የምንቃወምበት በተለይም አዲስ ሀሳብ አዲስ ራእይ የተለየ አካሄድ ይዘዉ ትግሉን የተቀላቀሉትን እንደጠላት ተረባርበን መማዉገዝና፤ እንደ እባብ ጭንቅላታቸዉን ቀጥቅጠን ያለ የሌለ ሀይላቸንን በመጠቀም አንገታቸዉን እናሰደፋለን፡ ሀሳባቸዉን እንዲሞክሩ እንኳን እድሉን አንሰጣቸዉም። በዚህም ድልን ተግናጽፈን ተደስተን እርስ በእርስ እየተጠፋፋን እንገኛለን።
በኛ ካምፕ
ወይ አንታገል
ወይ አናዋጣ
ወይ ዝም አንል
ወይ አንረዳዳ
ነገሩ ሁሉ ግራ ሚያጋባ ዘመን ላይ እንገኛለን።
ሰላማዊ ሰልፍ ለመዉጣት ልመና
ስብሰባ ለመገኘት ልመና
ለክብር፤ ለህሊና፤ ለነጻነት ለመታገል ለምኑኝ ሚባልበት ዘመን ላይ እንገኛለን።
ባንጻሩ ዘመን ተለዉጦ ስለ እዉነት መቆም፤ ለክብር፤ ለህሊና፤ ለነጻነት ለሀገር መታገል ሚያሳፍርበት፤ ስለነጻነት መናገር ጀግና ወንድ፤ የሀገር ልጅ፤ ሀገር ወዳድ ማስባሉ ቀርቶ፤ እንደ ቁምጥና ሚያሳፍርበትና አንገት የሚያስደፋበት፤ ስለ ክብርም መናገር የሚያስኮንንበት ዘመን ላይ ደርሰናል፡
ዛሬ ያልታደለችዉ ሀገራችን ኢትዮጵያ ልጆችዎ በሁለት ተከፍለዋል
1. በአንድ ወገን ያለዉ ስርአት በቀጥታም ሆነ በተዘዋዋሪ እንዲቀጥል አስተዋጽኦ እያደረጉ ያሉ አብላጫዎቹ (99.999%) ሲሆኑ
በዚህ ምድብ፡
1. የስርአቱ ዋና አራማጆች
2. ስርአቱን በመደገፍ በቆራጥነት የቆሙለት
3. ከማያዉቁት መላክ የሚያዉቁት ሴይጣን ይሻላል ብለዉ በፍራቻና አንገት በመድፋት የተቀመጡ፤
4. ስለ ኢትዮጵያ አያገባንም ከራሳችንና ጥቅማችን በላይ ነፋስ ብለዉ ክብራቸዉን፤ ስብእናቸዉንና፤ ህሊናቸዉን ዘግተዉ ምን ያገባናል ብለዉ የተቀመጡ
5. ሌሎቹ ደግሞ መታገል እየፈለጉ ግን በፍራቻና ከዚህ በፊት በደረሰባቸዉ መከራ እምነት በማጣት ትግሉን እርግፍ አድርገዉ ተስፋ ቆርተዉ የተቀመጡ
6. ባፋቸዉ ተቃዎሚ ነን የሚሉ ነገር ግን ለዘመናት ምንም ለትግሉ ስተዋጽኦ ሳያደርጉ ለመታገል የመጣዉን ሁሉ ነገር ግን በነሱ አመለካከት የማያምነዉን፤ ለነሱ ያላጎበደደዉን፤ ሁሉ በመቃወም የትግሉን ጎራ በማዳከም የስርአቱን እድሜ እያራዘሙ ያሉ የሚገኙበት ሲሆን
2. በሌላ ጎራ ደሞ ቁጥራቸዉ እጅግ አናሳ ቢሆንም ስርአቱን ሌት ተቀን በመታገል በሀገር ቤትና በዉጭ በአላማ ጽናት፤ በወኔ በመታገልና መስእዋትነት እየከፈሉ ያሉ የቁርጥ ቀን ወገኖች ሲሆኑ ዛሬ ቁጥራቸዉ አናሳ ቢሆንም ዉለዉ አድረዉ ግን ማሸነፋቸዉ አይቀሬ ነዉ። ምክንያቱም እዉነት ከነሱ ጋር ናትና። እነዚህም ዛሬ በየጫካዉ ለኛ ነጻነት እየተዋጉ፤ ለኛ ክብር ወህኒ ቤቶች ተወርዉረዉ የሚገኙ፡ ለኛ ክብር ባሉበት ቦታ ሁሉ ለሃገራቸዉ እየታገሉ ያሉትን ጀግና ዜጎች ሁሉ ያካትታል።
እነዚህ ዜጎች ሀገራቸዉን በቁርጥ ቀን ያልከዱ፤ ለእዉነት በመቆማቸዉ ህሊናቸዉን የማይቆረቁራቸዉ፤ ነገ ስማቸዉና ታሪካቸዉ ዘላለማዊ የሆነ፡ ነገ የልጅ ለጆቻችን የሚዘክሩላቸዉ ብርቅዬ ወገኖቻችን ናቸዉ።
ለሀገር የሚያኮራ ስራ ሰርቶ ስምና ዝና አትርፎ ከማለፍ በላይ ምን የሚያስደስት ነገር ይኖራል። ኖሮ ኖሮ በልቶ፤ ተኝቶ፤ ማለፍማ እንኳን ሰዉ ተብዬዉ እንስሳም ያደርገዉ
የለም። ዋናዉ ጥያቄ ግን እያንዳንዳችን የትኛዉ ምድብ ዉስጥ ነን የሚለዉ ሲሆን የህሊናዉን ሙግት ለናነተዉ እተዎለሁኝ።
ከላይ ያለዉን ተጨባጭ ሁኔታ በዝርዝር ካስቀመጥኩኝ ለዉጥ ከልባችን የምንፈልግ ከሆነ መፍትሄዉ ምንድን ነዉ ወደሚለዉ ሁላችንም ወደ ምንጠይቀዉ ጥያቄ እመጣለሁኝ።
1. ለዉጥ ከልባችን እንፈልጋለን ወይ? ? ? የሚለዉ ጥያቄ በእያንዳንዳችን እዉነትኛ ህሊና መልስ ማግኘት አለበት? በእዉነት ለዉጥ እንፈልጋለን ወይ? ከልብ ካለቀሱ እንባ አይገድም እንደሚባለዉ – ለዉጥን ከልቡ በጽናት የሚፈልግ ፍላጎቱን ለሟሟላት የማይፈነቅለዉ ድንጋይ ስለማይኖር ዉጤት ማግኘቱ አይቀሬ ነዉ
2. የትግሉን ክብደትና ጥልቀት ማወቅ ይጠበቅብናል በዚያዉም ልክ የአቅማችንን መጠን ማወቅ አለብን – ንቀታችንና ጥላቻችን የትም አላደረሰንም
3. ዉጤት የምንፈልግና አቅማችንን የምናዉቅ ከሆነ ከሆነ ለዉጤቱ የሚፈለግብንን ሁሉ ሳናመነታ ኢንቨስት ማድረግ አለብን፤ ጊዜ፤ገንዘብ፤ጉልበት፤እዉቀት፤ሞራል ወዘተ – ነጻነት በምጽዋት አይመጣም – መሄድ የሚገባንን መንገድ ሁሉ መሄድ ይጠበቅብናል
4. ትግሉ የማንም እንዳልሆነ መገንዘብ ይጠበቅብናል (የእያንዳንዳችን ሃላፊነት ነዉ – ምክንያት ድርደራ የትም አላደረሰንም – ስለትግሉ አዲሱ ፈሊጥ
– እኔ ፖለቲካ ዉስጥ የለሁበትም – ጀግንነት ሆኗል
– የምናምናቸዉ ሰዎች የሉም – እገሌ ማነዉ እሱ
– ሁሉም የፖለቲካ ድርጅቶች አይረቡም
– ዉጭ ያለዉ ሐይል ምንም አያደርግም
– ሀገር ቤት ያለዉ ካልተነሳ የትም አንደርስም

ሁሉም ጣቱን ሲጠቋቆም – ትግሉ ግን እያንዳንዳችን ትከሻ ልይ መሆኑን ዘንግተናል። ስለዚህ
– መሪዎቹንና ድርጅቶቹን ካላመናችሁ ግቡና አስተካክሉ
– ወይንም የራሳችሁን ጠንካራ የተሻለ መንገድ አምጡ- ብቻ በዚህም በዚያም ትግሉን ተቀላቀሉ – አማራጩ ሽንፈትን በጸጋ ተቀብለን – አቅማችንን አዉቀን እየታገሉ ያሉትን ትተን አርፈን መቀመጥ ይኖርብናል – እባካችሁ ባንደግፋቸዉ አናዳክማቸዉ
5. የኢትዮጵያ ተቃዋሚዎች ሁኔታ የዶሮና የእንቁላል ሆኗል። ህዝቡ ፖለቲካ ድርጅቶች ካልተጠናከሩ ዉጤት ካላሳዩን አንደግፍም ብሎ አኩርፎ ተቀምጧል። እነሱ ደሞ ሊጠናከሩ የሚችሉት ህዝቡ ሲደግፋቸዉ ነዉ። ግራ የሚያጋባ ሁኔታ። ይህ ካልተቀየረና ህዝቡ በተሳትፎ ካላጠናከራቸዉ የትም አይደረስም።
6. ሌላዉ ሁሉም ፖለቲካ ድርጅቶች አንድ ይሁኑ የሚለዉ ለሀያ አመት የተሞከረዉ ፈሊጥ መቼም አይሰራም – አግባብነት የለዉም – ልዩነት የጥንካሬ መሰረት ነዉ – ዋናዉ ቁም ነገር እርስ በእርስ በመጨራረስ የስርአቱን እድሜ አለማራዘም ነዉ። ስርአቱ እጁን አጣምሮ ደስ ሲለዉም የቤት ስራ እየሰጠን የእርስ በእርስ ሽኩቻ ድራማችንን እያየ ይገናል – መፍትሄዉ ቢቻል ተባብረን ካልተቻለም እርስ በእርስ ሽኩቻችንን አቁመን፤ የተሻሉ ናቸዉ የምንላቸዉን በሙሉ ሀይላችን መደገፍ የትግል አቅማቸዉን ማሳደግ ይኖርብናል – በዚያዉም ልክ ማናቸዉንም ተቃዋሚ ሀይሎችን የሚቃወምን ሁሉ ባለ በሌለ ሃይላችን በጋራ ማዉገዝና መዋጋት ይኖርብናል
7. ትግሉ ጊዜ የሚጠይቅ መሆኑን መረዳት በሂደትም መዉደቅና መነሳት መኖሩን መገንዘብ የኖርብናል፤ (ቅንጅት ቅንጅተ እያልን መቀመጡ የት አደረሰን)? አየር ባየር ዉጤት ፈላጊነት የትም አላደረሰንም፤ ዋናዉ ቁምነገር የፈጀዉን ጊዜ ይፍጅ ካላማችን ንቅንቀቀቅ ማለት የለብንም – የኩርፍያ ትግል የትም አላደረሰንም – ያላማ ጽናት ከሌለን አርፈን እንቀመጥ

በዚህ ጉዳይ ብዙ መናገር ለማጠቃለል ያክል ወደድንም ጠላንም
ዉጤት ያለ አዉነተኛ ፍላጎት
ዉጤት ያለ አቅም
ዉጤት ያለ መስእዋትነት
ዉጤት ያለ ጊዜ
በፍጹም አይገኝም፤
ፍላጎት አቅምና መስእዋትነት ሳይከፍሉ ዉጤትን መጠበቅ የዋህነት ነዉ። ይህንንም የያዝነዉን ፈሊጥና ባህል እንካልቀየርን ድረስ ስርአቱም በአሸናፊነቱ መቀጠሉ አይቀሬ ነዉ። የብዙዎቻችን ችግር የትግሉ ድል መፍትሄ በእጅችን ላይ መሆኑን መቀበል አለመፈለጋችን ወይም አለማወቃችን ነዉ። የወደቅነዉ መፍትሄ ከሌላ ቦታ መፈለጋችን ነዉ። ይህ እስካልተወጠ ድረስ ስርአቱ ለዘመናት መግዛቱን እንደማያቆም በእርግጠንነት ላረጋግጥላችሁ። ለዉጥ እንዲመጣ የሚፈልግ ዛሬ ነገ እያለ በቀጠሮ ሳይሆን ከልቡ ለዉጥን የሚፈልግ ከሆነ ዛሬ ካሁኗ ደቂቃ ጀምሮ ለራሱ ለህሊናዉ ለሀገሩ ለወገኑ ቃል መግባት ይኖርበታል። ስለሌላዉ ማሰባችንን ትተን ስለራሳችን እናስብ። በድርጅቶች ችግር አለ ብለን ካሰብን ገብተን እናሻሽላቸዉ፤ አሊያም የኛ አማራጭ የተሻለ ነዉ የምንል ከሆነ የተሻለ ድርጅት መስርተን ትግሉን እንቀላቀል። በዚህም በዚያም ገብተን እንታገል። የትም እንፍጨዉ ዉጤቱን እናምጣዉ።

እኔ ይህንን ስናገር የሽግግር ም/ቤቱ ግቡ ብዬ አይደለም፡ ለእናንተ ትግል ዉስጥ መግባት የድርጅቶች ጥንካሬ ቅድመ ሁኔታ አይደለም ወሳኙ። የራሳችሁ የህሊና ዉሳኔ ነዉ። ያንን የዉሳኔ ደረጃ ካለፋችሁና ለራሳችሁ ቃል ከገባችሁና ያለማወላወል ወደተግባር ከለወጣችሁ ሌላዉ ሁሉ ይስተካከላል። የተገላቢጦሹን ከፈለጋችሁ ግን ምን አለ በሉኝ ምንም ለዉጥ እንደማይመጣ በድጋሚ አረጋግጣለሁ።
ስለዚህ ብቸኛዉ ያለን የአካሄድ ቀመር በግልጽ እንዲህ ነዉ
1. እያንዳንድችን ዛሬ ትግሉን በቆራጥነት መቀላቀልና ሚከፈለዉን መስዋትነት ሁሉ መክፈል፤ በተጨማሪም ትግሉ የወሰደዉን ጊዜም ቢወስድ በቁርጠኝነት ለመታገል መዘጋጀት
2. በግል የትም ለመድረስ ስለማይቻል ያሉትን ድርጅቶች መርምሮ የተሻለ ነዉ የምንለዉን ዛሬዉኑ ተቀላቅሎ በሙሉ ሀይል መግባትና መታገል
ስለዚህ እመኑኝ የድሉ ቁልፍ እያንዳንዳችሁ ናችሁ። ሌላ ምንም አማራጭ የላችሁም።
ይህንን ለማድረግ ከፈቀድንና ለራሳችን በእዉነተኝነት ቃል ከገባን ምንገነባዉ አቅም የምንመኘዉን ዉጤት ይዞልን ይመጣል። ስለዚህ
የፍላጎት አቅም
የዉሳኔ አቅም
የሞራል አቅም
የአላማ ጽናት አቅም
የማቴርያል አቅም
የድርጅት አቅም
ለድላችን ወሳኝ መሆኑን ተረድተን ዛሬ ነግ ሳንል ትግሉን እንቀላቀል። በኛ በኩል እዉነቱን መራራም ቢሆን ተናግረናል፤ ለህሊናችን የሚቆጨን ነገር የለም፡ የህሊና ትግሉን ለናነት ትተናል።

እኛ በራሳችን በኩል የተሻለ ነዉ ያልነዉን አማራጭ አቅርበን ትግላችንን ተያይዘነዋል። በማናቸዉም መንገድ ለማንም ሳንል፤ ለእዉነት ብቻ ብለን፤ ለክብራችን ብለን፤ ለነጻነታችን ብለን፡ ትግሉ ጊዜ እንደማይሰጥ ተረድተን ቀጠሮ ሳንሰጥ የድሉን ጽዋ እስክንጎነጭ፤ ማንም ምንም የበል ምን፤ በቁርጠኝነት እየታገልን እንገኛለን። ልዩነቱ የህሊና እርካታ፤ የመንፈስ የማንነት ጽናትን ሰጥቶናል። ወርቅ በእሳት እንደሚፈተነዉ ችግርና መከራን ለመጋፈጥ ትግሉን በቆራጥነትና በኩራት እያከናወንን እንገኛለን። በስራችንም ኩሩ ኢትዮጵያዉያን እንደምንሆን አንጠራጠርም፤ ለእዉነት በመቆማችንና አምላክም ከቅኖች ጋር በመሆኑ አሸናፊዎች እንደምንሆን ሙሉ እምነት አለን። ከዚህ በላይ ታዲያ ምን የሚያስቀና ነገር ይኖራል።
ሀገራችን ክብራችን፤ የማንነታችን መለያ፤ የነጻነታችን ምልክት ናት። ማንም ይህንን ሊነጥቀን አይገባዉም፤ በትግላችንም የተነጠቅነዉን ማንነታችንን ያለጥርጥር እናስመልሳለን!!!
ድርጅታችንን በለመለከተ ግን አቋማችን ንጥር ያለና ግልጽ ነዉ
1. የማንም ኢትዮጵያዊ ክብርና፤ ነጻነት፤ በማናቸዉም ሁኔታ ሳይሸራረፍ መረጋገጥ ይኖርበታል እንላለን። አምላካችን የሰጠንን መብት ለማንም አሳልፈን አንሰጥም። ስርአቱ የሚሰራዉን ግፍ ያለምንም ቅድመ ሁኔታ እስካላቆመ ድረስ በፍጹም አለማመንታት መቀየር አለበት በሚለዉ አቋማችን ጸንተን ትግላችንን እንቀጥላለን – ይህም ስርአት ሁሉን ኢትዮጵያዊ አካላትን ባካተተ የሽግግር መንግስት እስኪተካ ትግላችንን በጽናት እንቀጥላለን
2. ህዝባዊ የለዉጥ እንቅስቃሴ በመፍጠር ስርአቱን በህዝባዊ ትግል ለመገርሰስና ትግሉን በድል ለማጠናቀቅ ህዝቡ ትግሉን እንዲቀላቀል ትግላችንን ሌት ተቀን እንቀጥላለን
3. ስርአቱም ሲገረሰስ የሚከሰቱ ችግሮችን ለመቅረፍ ቀድሞ መሰናዳት የተሻለና ብልህነትን የተላበሰ ማራጭ መሆኑን ስለምናምን የሽግግር ሂደቱ ምን መምሰል እንደሚኖርበት ቅድመ ዝግጅቶችን እንደርጋለን
4. ይንንኑም ለማከናወን የሚያስችል ድርጅታዊ አቅም እንገነባለን በዚህም አካሄድ ያለማወላወል እንቀጥላለን።
5. ከሌሎች ሁሉም አሁንም እደግመዋለሁ ከሁሉም የተቃዋሚ ሀይሎች ጋር በጋራ እንሰራለን፤ ተቃዋሚ ሀይሎችም በጋራ እንዲሰሩ ማናቸዉንም ሁኔታዎች እናመቻቻለን
ስለዚህ የድርጅታች የነጠረና ግልጽ ያለ አማራጭን ያቀረበ ሲሆን፡ ይሻላል ብላችሁ ካመናችሁ ተቀላቀሉን። አለበለዚያ ሌላ የተሻለዉን ድርጅት ዛሬዉኑ ተቀላቀሉ። አንድ ነገር ላረጋግጥላችሁ ትግሉ ይቀጥላል። ተጠናክሮ ይቀጥላል። ባቡሩን በጊዜ ተቀላቅሎ የለዉጡን ሂደት ማፋጠኑ የናንተ ሀላፊነት ነዉ። በታሪክ ተጠያቂነት ምርጫዉን ለናንተ እተዋለሁ። የሚሻለዉን የጽናት መንገድም አምላክ ያሳያችሁ ዘንድ ሁሌም እጸልያለሁ።

ሀገራችንን ኢትዮጵያን አምላክ ይባርክ!!!