የምርጫው ሂደት ሙሉ በሙሉ የታፈነ ነበር፣ ህዝቡም የፈለገውን መምረጥ በማይችልበት ደረጃ ላይ በተለያዩ ምክንያቶች አስፈራርቶ ይዞታል የሚለው አቶ ስዒድ አሊ የምርጫውን ሂደት ሲያስረዳ፣ ቅስቀሳ በምናደርግበት ወቅት ፖስተር ስንለጥፍ ወዲያውኑ የወያኔ ተላላኪዎች ይቀዱታል ወይም የራሳቸውን ፖስተር በእኛ ላይ ይለጥፉበታል። ይህን አይነት ድርጊት በሚፈፅሙበት ጊዜ የእኛ አባሎች ለመከላከል ሲሞክሩ አርፈህ ተቀመጥ የሚል ማስፈራሪያ ይሰጣል። ከዚያ ባለፈም እቤትህ ድረስ መጥተው አፍነው የፈለጉትን ያደርጉሃል ብሏል።

ሌላው የኢትዮጵያ ሕዝብ አርበኞች ግንባርን የተቀላቀለው በባህር ዳር ከተማ በቀበሌ 17 የኢዴፓ ታዛቢ የነበረው አቶ አበራ ካሴ ዘውዴ ሲሆን፣ ወያኔ ምርጫ አካሂጃለሁ ከሚል ግልፅ አፈና አካሂጃለሁ ቢል ይሻለዋል ሲል ገልፆታል። አቶ አበራ ካሴ በምርጫው ወቅት የነበረውን ሁኔታ ሲገልፅ እኔ በነበርኩበት የምርጫ ጣቢያ አብዛኛው ማለት ይቻላል ድምፅ ሊሰጡ የመጡት ፖሊሶች ሲሆኑ እግረ መንገዳቸውንም ከፍተኛ ማስፈራራትና ወከባ ሲፈጥሩ ነበር ሲል ገልጿል።

መምህር ደምለው ይግዛው ፈንቴ የሰሜን ጎንደር ዳባት ወረዳ የመኢአድ ተዘዋዋሪ ወኪል ሲሆን፣ ያለፈውን የምርጫ ሂደት ሲገልፅ፣ እኛ ምንም አይነት ቅስቀሳ ወደ ሕዝብ ገብተን ማድረግ አንችልም። ፖስተሮች ይገነጠላሉ፣ የእኛን መለያ ይዘው የተገኙ ሰዎች እንግልትና ወከባ ይደርስባቸዋል።

እኛ እንኳን ሕዝባችንን ሰብስበን ልንቀሳቀስ ይቅርና አባሎቻችንን በፅ/ቤት ተሰብስበን ስንበተን መንገድ ላይ በመጠበቅ ከፍተኛ እንግልት ነው ሲፈጥሩብን የነበረው የሚለው መምህር ደምለው ይግዛው አያልነህ ጌታነህ የተባለ አባላችንን ዳባት ወረዳ ቀበሌ 01 ቆልቶ በላ የተባለ ቦታ ላይ አፍነው አይኑን አስረው ከአሰቃዩት በኋላ በማግስቱ ለቀውታል ይልና፣ የዳባት ወረዳ ምርጫ ፅ/ቤት ሃላፊ ተስፋ ሹምባሽ የተባለው እኔን አስጠርቶ ነገሮችን በዝምታ ለማሳለፍ በመሞከርህ ህይውትህን አትርፈሃል ብሎኛል ሲል በአካባቢያቸው የምርጫው ሂደት ለማስመሰል ያህል እንኳ የተሰራበት እንዳልነበር በምሬት ገልፆ፤ ይህ ዘረኛና ፀረ-ህዝብ ቡድን በመሳሪያ ሃይል ካልሆነ ከህዝባችን ጫንቃ ላይ አይወርድም በመሆኑም የኢትዮጵያ ሕዝብ አርበኞች ግንባር ጎን ለመሰለፍ ወስነናል ብሏል።

የመኢአድ አባልና በሰሜን ጎንደር የዳባት ወረዳ መኢአድ ወጣቶች ሊቀመንበር የሆነው አቶ ተክሌ ታከለ ገዛኽኝ ሲሆን፣ ምርጫውን ወያኔ ብቻውን ሮጦ ብቻውን ያሸነፈበት ነው ይልና፤ በዳባት ወረዳ አጀሬ ፣ ደንከር ፣ ኮንፍየ ፣ ደቋ ፣ጭና፣ አረቡር የምርጫውን ሂደት እንዲታዘቡ የተላኩ የመኢአድ ታዛቢዎች እየተደበደቡ ከአካባቢው እንዲለቁ እንደተደረጉ ገልጿል። አያይዞም አርሶ አደሩን ሕዝብ ማንን እንደመረጣችሁ አሻራችሁ በኮምፒዩተር ስለሚታወቅ በስህተት ተቃዋሚዎችን እንዳትመርጡ፣ እነሱን መርጦ የተገኘ ሰው መሬቱንም ጭምር ሊቀማ እንደሚችል ማስፈራሪያ እንደደረሳቸው አስታውቋል።

በዚህና መሰል የወያኔ ግፈኛ አገዛዝ የተማረረው ሕዝብ አንገቱን የደፋ ቢመስልም ልቡ ግን እንደተነሳሳ ገልፆ አብዛኛው የአካባቢው አርሶ አደር በበረሃ ከኢህአግ ሠራዊት ጋር እየተቀላቀለ መሆኑን አቶ ተክሌ ገልጿል።

ሌላው ደረጀ ወረታ ከበደ የተባለው በመተማ የመድረክ አባልና አደራጅ የነበረ ሲሆን፣ በመተማ ሽኽዲ አካባቢ ያደርገው በነበረው እንቅስቃሴ የመተማ የማስታወቂያ ቢሮ ሃላፊ የሆነው ገዛኽኝ ሞገስ የተባለ ወያኔ ለመቶ አለቃ ሞገስ የተባለ ፖሊስ ትዕዛዝ ሰጥቶ ምርጫው እስኪጠናቀቅ የቁም እስረኛ እንደነበረ ገልጿል።

በመተማ አካባቢ ወያኔን በሚቃወሙ ሰዎች ላይ ከፍተኛ እንግልት እየተፈፀመ ሲሆን፣ ሙሉ ጌታ አበጀ የተባለ የሽኽዲ ነዋሪ አፍነው ወስደውት የት እንዳደረሱት አይታወቅም፣ አንድ መላኩ የተባለ የ10ኛ ክፍል ተማሪም እነሱን ስላልደገፈ ብቻ ፈተና ላይ እንዳይቀመጥ በመከልከልና ከፍተኛ ስቃይ ስላደረሱበት አዕምሮውን ስቶ የት እንደገባ አይታወቅም የሚለው አቶ ደረጀ ወረታ ወያኔን ሁላችንም በአንድነት ስለአንድነት ልንፋለመው ይገባል ብሏል።